, ,

Aðalfundur 2005

Aðalfundur SumS var haldinn þann 15. mars s.l. í Hringsal LSH.
Um 40 manns mættu á fundinn.

Dagskrá aðalfundar var samkvæmt lögum SumS.

Varaformaður bauð gesti velkomna og setti fundinn.

Fyrsta mál á dagskrá var kosning fundarstjóra og fundarritara.

Stungið var upp á Aðalheiði K. Þórarinsdóttur sem fundarstjóra og Guðbjörgu Pálsdóttur sem fundarritara og var það samþykkt.

Skýrsla stjórnar um starfsemi félagsins:

Varaformaður flutti skýrslu stjórnar.

Á fyrsta fundi eftir stofnfund, skipti stjórn með sér verkum:

  • Jón Hjaltalín Ólafsson var kosinn formaður á stofnfundi
  • Jóna Kristjánsdóttir var kosin varaformaður,
  • Guðbjörg Pálsdóttir ritari
  • Karl Logason gjaldkeri og
  • Aðalheiður K. Þórarinsdóttir meðstjórnandi
  • Varamenn eru þau:
  • Herborg Ívarsdóttir og Már Kristjánsson

Stjórn SumS hefur haldið 4 fundi frá stofnun og m.a. hafa verið rætt fyrstu skref samtakanna.

Allir stjórnarmeðlimir hafa mikinn metnað fyrir hönd samtakanna en eru sammála um nauðsyn þess að byrja rólega og í fyrstu var ákveðið að einblína á:

  • aðalfundinn og fá þar inn tvö góð fræðsluerindi
  • koma á fót heimasíðu.

Tveir stjórnarmeðlima hafa óskað eftir að draga sig í hlé.

Á fyrsta fundi óskaði Aðalheiður K. Þórarinsdóttir eftir að ganga úr stjórn þar sem hún er að hefja nám að nýju. Jón Hjaltalín Ólafsson dró sig einnig í hlé sökum anna í sínum störfum. Varamenn komu inn í stjórn í staðinn.

Þökkum við þeim gott samstarf og hjálp við undirbúning og stofnun SumS.

Lagabreytingar

Ekki komu fram neinar tillögur um breytingar á lögum.

Endurskoðaðir reikningar félagsins lagðir fram

Karl Logason gjaldkeri lagði fram stöðu samtakanna um síðustu áramót. Samtökin eiga 283.741 kr.

Formannskosning

Þar sem núverandi formaður Jón Hjaltalín Ólafsson hefur dregið sig í hlé, þurfti að kjósa nýjan formann og var stungið upp á Karli Logasyni æðaskurðlækni sem næsta formanni Sums. Var það einróma samþykkt.

Kosning stjórnar

Stungið var upp á stjórnarmönnum SumS, Guðbjörgu Pálsdóttur, Herborgu Ívarsdóttur, Jónu Kristjánsdóttur og Má Kristjánssyni sem öll höfðu gefið kost á sér. Einróma samþykkt.

Kosning varamanna

Elín Ólafsdóttir húðlæknir og Hanna Þórarinsdóttir hjúkrunarfræðingur

Kosning tveggja skoðunarmanna reikninga

Tilnefnd voru þau Ásta Thoroddsen og Einar Hjaltason. Var það samþykkt.

Árgjöld félagsmanna og styrktaraðila ákveðin

Stungið var upp á að félagsgjöld fyrir árið 2005 yrðu 2000 kr. og árgjöld styrktaraðila 50.000 kr. Samþykkt.

Önnur mál

Heimasíða samtakanna kynnt og formlega tekin í notkun. Var það varaformaður SumS sem tók síðuna í notkun.

Fundargestir lýstu ánægju sinni með síðuna og þótti hún bæði falleg og vel gerð.

Að loknum aðalfundarstörfum fengu fundarmenn sér kaffi og skoðuðu hvað styrktaraðilarnir höfðu til sýnis fyrir framan fundarsalinn.

Að kaffihléi loknu var komið að tveimur fræðsluerindum.

Baldur Tumi Baldursson húðsjúkdómalæknir með erindið “Húðbitaflutningur til að flýta lækningu sára” og Karl Logason með erindið “Yfirborðsbláæðaaðgerðir á fólki með fótasár”.